افغانستان به په ۲۰۲۰ لمریز کال کې د څارندوی نړیوالې کمیټې غړۍ شي
پوهنې وزارت- کابل: د افغانستان څارندویانو وکولای شول د څارندوی نړیوالې کمیټې غړیتوب تر لاسه کړي، دا غړیتوب به په رسمي ډول په ۲۰۲۰ لمریز کال کي د مصر په هیواد کې افغانستان ته ورکړل شي.
دا خبر د پوهنې وزیر ډاکتر محمدمیرویس بلخي په شتون کې، په افغانستان کې د څارندوی رامینځ ته کیدو په ۸۸ مه کلیزه او د کابل په پولي تخنیک پوهنتون کې د پالندوی لمړنۍ څانګۍ پرانستلو په غونډه کې وویل شوه.
پوهنې وزیر په دې غونډه کې نویو څارندویانو او پالندویانو ته په وینا کې وویل چې نن ورځ ستاسو له لارې د نړۍ په سطحه په زړه پورې فعالیتونو تر سره کیږي او دا ټول د دریم زریزې د موخو یوه وړوکې برخه ده او تر ټولو لویه پانګه يې په ځان بساینه ده.
ډاکتر بلخي د جنسي او طبقاتي تاوتریخوالي کمښت، د چاپیریال په ساتنه کې مرسته، عامه روغتیا، ښاروالي، ښوونه او روزنه، سواد زده کړه، سوله، ټولنیز خدمتونه او داسي نورې کړنې د څارندویانو او پالندویانو له رضاکارانه فعالیتونو څخه یادې کړې او د ټولنې ټولو ښاریانو ته د دې اصولو د رعایت کولو د ترویج او ترغیب په موخه يې د هغوي په رسالت سرته رسولو باندې ټینګار وکړ.
د آسیا ملاتړ منطقوي مرکز پسفیک د څارندوی نړیوال دفتر استازي وانګ تینګ چینګ په دې غونډه کې د افغانستان د نړیوال څارندوی له غړیتوب څخه خوښي وښوده او د ښاري رضاکارانه او داوطلبانه فعالیتونو کې د افغان ځوانانو د مسئولیت او جدیت څخه ستاینه وکړه.
د افغانستان څارندوی ملاتړ کوونکي موسسې اجرایوي رئیسې آغلې مارنی ګستف سن د څارندویانو او پالندویانو څخه د ډير ملاتړ ژمنه ورکړه.
د افغانستان څارندوی مسئول رئیس محمد اقبال قاری زاده د هیواد څارندوی غړي یې ۹۶ زره تنه یاد کړل.
د یادونې وړ ده چې په دې غونډه کې د پوهنې وزارت مشرتابه په شتون کې د پالندوی دوه څانګو غړو تحلیف او د یادې غونډې په څنډه کې د څارندویانو انځورونو له نندارتون څخه لیدنه وکړه.
