د پوهنې وزارت د ودانیو او املاکو د ساتنې او مراقبت کارکوونکو لپاره د مسلکي وړتیا لوړولو څلور ورځنۍ برنامه جوړه شوه
د پوهنې وزارت د کارکوونکو چارو لوی ریاست اړوند د تشکیلاتو ریاست په نوښت، د کابل ښار په ګډون د ولایتونو د پوهنې ریاستونو د ودانیو او املاکو د ساتنې او مراقبت کارکوونکو مسلکي وړتیاوو لوړولو په موخه، څلور ورځنۍ روزنیزه برنامه جوړه شوه.
په پیل کې د پوهنې وزارت د تشکیلاتو رئیس محترم مفتي عبدالحلیم حلیمي ګډونوالو ته د ښه راغلاست ترڅنګ، د دغې روزنیزې برنامې د موخو، ارزښت او اړتیا په اړه هر اړخیزه وینا وکړه.
نوموړي د کارکوونکو د مسلکي وړتیا لوړول د کاري چارو د ښه والي او د ادارو د اغېزمنتیا لپاره مهم وبلل او له ګډونوالو یې وغوښتل چې د پروګرام له روزنیزو مطالبو څخه اعظمي ګټه پورته کړي.
ورپسې د کارکوونکو چارو لوی رئیس محترم مولوي جنت ګل عزیز د خپلو خبرو پر مهال په کاري دندو کې پر صداقت، اخلاص، ژمنتیا او د سپارل شویو مسوولیتونو پر سم ترسره کولو ټینګار وکړ او څرګنده يې کړه چې د اداري چارو د لاښه پرمخ وړلو لپاره د کارکوونکو مسلکي وړتیا، کاري انضباط او مسوولیتپذیري بنسټیز ارزښت لري.
په ورته مهال، د پوهنې وزارت مالي او اداري معین محترم الحاج مولوي صبغت الله وصیل، په ورځنیو چارو کې د دقت، امانتدارۍ، وفادارۍ او مسوولیتپذیرۍ پر ارزښت خبرې وکړې.
نوموړي له ټولو ګډونوالو وغوښتل چې خپلې دندې په پوره اخلاص او ژمنتیا ترسره کړي، له شته امکاناتو څخه اغېزمنه ګټه واخلي او د خپلو کاري مسوولیتونو په ترسره کولو کې دقت او نظم په پام کې ونیسي.
همدارنګه، د ودانیو د ساتنې او املاکو رئیس محترم مولوي محمداسحاق مقدس په خپلو خبرو کې د ښوونیزو بنسټونو د اړتیاوو د پېژندنې، ارزونې او په اړه یې د مناسبو اقداماتو پر اهمیت رڼا واچوله او زیاته يې کړه چې د ودانیو او املاکو د ساتنې او مراقبت په برخه کې د کارکوونکو د کاري اړتیاوو او ستونزو له پېژندلو وروسته هڅه کوي، د هغوی د مسلکي وړتیاوو د لوړولو لپاره د اړتیاوو له مخې روزنیز پروګرامونه جوړ او پلي کړي.
یاده غونډه د پوهنې وزارت د استخدام د رئیس محترم مولوي محمدصادق صديقي له لوري تر لنډې علمي وینا وروسته په مبارکې دعائیې سره پای ته ورسېده.
