په لوګر ولایت کې د یوه ښوونځي د درسي ټولګیو جوړولو چارې پیل شوې
د لوګر ولایت مرکز جباري کلي کې د «احرار لومړني ښوونځي» لپاره د څلورو درسي خونو او یوه دهلیز جوړولو کارونه د شاوخوا ۶۰۰ زره افغانیو په لګښت د سیمې د خلکو په مالي ملاتړ پیل شول.
د یاد ولایت پوهنې رئیس الحاج مولوي ګلولي متقي د معارفپالو خلکو له مادي او معنوي ملاتړ څخه د قدردانۍ ترڅنګ وویل: «یاد لومړنی ښوونځی چې څلور کاله وړاندې د پوهنې وزارت له لوري جوړ شوی و، اوسمهال شاوخوا ۲۰۰ تنه زده کوونکي پکې په زده کړو بوخت دي».
د نوموړي په وینا د یادو ټولګیو په جوړېدو سره به د درسي صنفونو د کمښت ستونزه تر یوه حده راکمه شي.
