د پوهنې وزارت له عادي بودیجې څخه د ۲۰۵ مېلیونه افغانیو په لګښت، ۴۳۰ بابه تعلیمي او اداري مرکزونه بیارغول کېږي
د پوهنې وزارت د ودانیو او املاکو د ساتنې او مراقبت رئیس محترم مولوي سمیع الحق حماس په وینا، د ۱۴۰۴ لمریز کال له پیل راهیسې، د مدارسو، ښوونځيو او اداري دفترونو د بیارغونې ۴۳۰ پروژې د ۲۰۴ مېلیونه ۸۹۹ زره ۱۵۶ افغانیو په ټولیز لګښت تر کار لاندې دي، چې له دې جملې څخه ۲۰۳ پروژې بشپړې او پاتې ۲۲۷ پروژې د جوړولو په حال کې دي.
د یادونې وړ ده، چې پوهنې وزارت په ټول ملک کې د ماشومانو لپاره د متوازنو تعلیمي اسانتیاوو برابرولو ته ژمن دی او په دې برخه کې له ټولو علمپروره هېوادوالو څخه د همکارۍ غوښتنه کوي.
