د پوهنې وزارت د معین په مشرۍ پلاوي روسیې ته رسمي سفر وکړ
د روسیې فدراتیف جمهوریت په رسمي بلنه، د پوهنې وزارت د ښوونې او روزنې د معین الحاج مولوي سخاءالله سعید په مشرۍ د افغانستان اسلامي ا.مارت لوړ پوړي پلاوي، د پوهنې وزیرانو په درېیم نړۍوال کنفرانس کې ګډون لپاره د یاد هېواد کازان ښار ته ورسېد.
په پلان کې ده چې دغه پلاوی به د افغانستان د پوهنیز نظام د څرنګوالي پر محوریت، تعلیمي فرصتونو او آسانتیاوو په اړه مفصل معلومات وړاندې او نړۍواله ټولنه به وهڅوي، ترڅو د افغانستان د ښوونیز او روزنیز نظام په کمي او کیفي پراختیا کې رغنده رول ولوبوي.
همدارنګه تمه کېږي چې یاد پلاوی به د دې کنفرانس په څنډه کې د ګډون کوونکو هېوادونو د پوهنې له یو شمېر وزیرانو سره هم وګوري او د متقابلو فرصتونو او همکاریو په اړه به نظرونه تبادله کړي.
