له مرکز او ولایتونو د پوهنې څو لنډ خبرونه
- کابل ښار:
د کابل ښار پوهنې ریاست لخوا، د پوهنې وزارت د پلان او پالیسۍ ریاست په همکارۍ، د عملیاتي پلانونو د پلي کولو مهارتونو لوړولو په تړاو یو ورځنی سیمینار، د کابل ښار پوهنې مرکزي هستې او شپاړس ګونو تعلیمي ناحیو آمرینو لپاره جوړ شو.
- لوګر:
د سيمې د خلکو په غوښتنه او د پوهنې وزارت په منظورۍ، د پندي منځنی ښوونځی چې په ١٣٧١ لمريز کال کې په لوګر ولايت کې تاسیس شوی و، د يو لړ مراسمو په ترڅ کې چې د دغه ولايت پوهنې مسئولينو په کې ګډون کړى و، د لېسې کچې ته ارتقاء ورکړل شوه.
- نیمروز:
د برادران نورزاد شرکت لخوا، د نیمروز ولایت له ښوونځیو سره د ۵۹۰ پایو مېزونوـ څوکیو مرسته وشوه.
- هلمند:
د هلمند ولایت یو شمېر سوداګرو، د مارجې ولسوالۍ د مرکزي لېسې له ۱۰۷ بې وزله زده کوونکو سره مرسته وکړه.
