پکتيا ولايت کې د ۲ مېليونه افغانيو په لګښت د يو ښوونځي په انګړ کې نوي درسي ټولګي جوړېږي
د پکتيا پوهنې رياست چارواکي خبر ورکوي، چې د یاد ولايت يوسف خېل ولسوالۍ په يوسف خېل کلي کې د عبدل بابا ښوونځي په انګړ کې د نویو درسي ټولګیو د بنسټ ډبره کېښودل شوه.
د دوی په خبره، د پورتنیو ټولګیو د جوړولو لګښت دوه میلیونه افغانۍ اټکل شوی، چې د یادې ولسوالۍ د پوهنې د مینه والو له لوري ورکول کېږي.
په یادو مراسمو کې د پکتیا پوهنې ریاست پر مسئولینو سربېره منورینو او د یادې ولسوالۍ د خلکو استازو هم حضور درلود.
ويناوالو د ټولنې په پرمختګ او سمون کې د پوهنې د مرکزي رول په اړه خبرې وکړې او د هېواد د ښوونيز نظام پياوړتيا په برخه کې يې د پوهنې وزارت د رهبرۍ هڅې وستايلې او د ياد وزارت د کړنو ستاينه يې وکړه.
د پوهنې وزارت مشرتابه هم د هېواد له پوهنیز نظام سره د خلکو له مادي او معنوي ملاتړ مننه کوي.
