د پوهنې وزارت سرپرستې د آترا ادارې له رئیس سره لیدنه وکړه
د پوهنې وزارت سرپرستې آغلې رنګينې حميدي د آترا ادارې له رئيس ښاغلي منصور انصاري سره په خپل کاري دفتر کې ليدنه وکړه، په دې ناسته کې د ښوونې او روزنې معين ډاکټر عطأالله واحديار او د پوهنې وزارت د معلوماتي ټکنالوژۍ رئيس عبدالمتين هجران هم ګډون کړى وه، ياده ناسته کې، له انټرنټ سره د ښوونځيو نښلولو په تړاو خبرې اترې وشوې.
د آترا ادارې رئيس د پوهنې وزارت د غوښتنې پر اساس، انټرنټ سره د ښوونځيو نښلولو په برخه کې د هر ډول آسانتياو برابرولو او همکارۍ ژمنه وکړه او وټاکل شوه چې د دواړو خوا تخنيکي ټيمونه به د عملي کار په برخه خپلې ګډې ناستې پيل کړي.
د پوهنې وزارت مشرتابه، انټرنټ سره د ښوونځيو او د ياد وزارت د نورو ادارو د نښلولو او له يادې لړۍ څخه د ملاتړ په برخه د آترا ادارې له همکارۍ ډيره مننه وکړه.
هيره دې نه وي، چې له فلتر شوي انټرنټ سره د ښوونځيو د نښلولو موخه دا ده، چې زده کوونکي د نړۍ له نويو علمي پرمختګونو څخه خبر شي او ښوونيزو چارو کې ترې ګټه پورته کړي همداراز زده کوونکي به په آنلاين ډول د هيواد په ګوټ ګوټ کې له نورو زده کوونکو سره، په علمي سياليو کې ګډون وکړي.
