په پکتیا ولایت کې د زده کوونکو لپاره د "ساینس ستوري" علمي سیالۍ پیل شوې
د پوهنې وزارت د نصاب او د ښوونکو مسلکي پراختیا لوی رئیس الحاج مولوي اول ګل ایوبي، په داسې حال کې چې د پکتیا ولایت پوهنې رئیس الحاج مولوي عبدالقیوم فاروقي او یو شمېر نورو مسئولینو هم حضور درلود، د یاد ولایت د ښوونځیو د زده کوونکو ترمنځ "د ساینس ستوري" علمي سیالۍ پرانیستې.
د پوهنې وزارت د نصاب او د ښوونکو مسلکي پراختیا لوی رئیس د يادو سياليو د پیل په مراسمو کې وويل، له دغو سياليو يې بنسټیزه موخه، د هېواد د ښوونځيو د زده کوونکو ترمنځ د غوره استعدادونو پېژندنه ده او څرګنده یې کړه، له لومړۍ څخه تر درېیمې نمرې پورې ممتاز زده کوونکي به په ځانګړو جایزو وویاړل شي.
د پکتيا پوهنې رياست د مسئولينو په وينا، د دغه ولايت د مرکز او ولسواليو په شپږو ښوونیزو ناحیو کې به له لومړي څخه تر درېيمې نمرې پورې د ښوونځيو له ۳۰۹ تنو زده کوونکو څخه آزموينه واخيستل شي.
ټاکل شوې ده چې د ګډون کوونکو د آزموینو پایلې به تر دقیقې ارزونې وروسته په راتلونکې میاشت (لړم) کې اعلان شي.
