په لوګر ولایت کې د یو خیریه بنسټ په مالي مرسته درې بابه درسي ټولګي جوړېږي
د پوهنې وزارت د مقام د دفتر لوی رئیس الحاج مولوي شهاب الدین «ثاقب» او ورسره مل پلاوی چې د لوګر ولایت د پوهنیزو چارو په ارزونه بوخت دی، د یاد ولایت مرکز اړوند د صالح محمد منځني ښوونځي په انګړ کې د دریو درسي ټولګیو د بنسټ په مراسمو کې ګډون وکړ.
د همدغو درسي ټولګيو پر جوړولو چې د دغه ولايت د یو تن علم پروره شخصیت حاجي ګل آاغا له خوا تمویلېږي، ټولټال ٣٦٠ زره افغانۍ لګښت راځي.
د پوهنې وزارت د مقام د دفتر لوی رئیس له پوهنې سره د مرسته کوونکو هېوادوالو له همکاریو مننه وکړه او له نورو شتمنو خلکو يې وغوښتل، چې د پوهنیز نظام سره مادي او معنوي مرستو ته دوام ورکړي.
د يادونې وړ ده، چې دغه ښوونځى شاوخوا ١٤ کاله وړاندې تاسيس شوى او اوسمهال پکې ٦٥٠ تنه زده کوونکي زده کړې کوي.
