په جوزجان ولایت کې د امام ابوحنیفه (رحمه الله علیه) ښوونځي بنسټ ډبره د ۱۸ مېلیونه افغانیو په لګښت کېښودل شوه

د جوزجان ولایت مرکز شبرغان ښار په ایتمه قلعه کلي کې د امام ابوحنیفه (رحمه الله علیه) ښوونځي بنسټ ډبره، د پوهنې مسئولینو، د محلي ادارو چارواکو او د خلکو د استازو په حضور کې کېښودل شوه.
د یاد ولایت والي محترم الحاج قاري گل‌حیدر شفق، د دغو مراسمو پر مهال وویل چې ښوونه او روزنه د ټولنې د سوکالۍ او د هېواد پرمختګ لپاره ډېره مهمه ده او کورنۍ باید خپل ماشومان د علم او پوهې ترلاسه کولو په موخه مدارسو او ښوونځيو ته ولېږي.
په ورته مهال د جوزجان پوهنې رئیس محترم الحاج مولوي لعل‌جان راشد وویل چې د امام ابوحنیفه (رحمه الله علیه) د ښوونځي نوې ودانۍ به ۶ درسي ټولګي، ۲ اداري خونې، لوبغالی، شنه ساحه، ۶ غرفې تش‌نابونه، احاطوي دېوال، ۱۶۰ پایې مېزونه اوڅوکۍ، د برېښنا سیسټم او د اوبو یو حلقه څاه له زېرمتون سره ولري.
د نوموړي په وینا، دا ښوونځي د یوې مرستندویه ادارې په مالي مرسته جوړېږي، چې ټولیز لګښت یې له ۱۸ مېلیونه افغانیو څخه زیات اټکل شوی دی.