د پکتیکا ولایت په یوه دیني مدرسه کې د درسي ټولګیو او کتابتون جوړولو چارې پیل شوې

د پکتیکا ولایت په بکخېل ولسوالۍ کې « د فیض المدارس حمیدیه دیني مدرسې» لپاره د درسي ټولګیو او یو کتابتون جوړولو کارونه پیل شوي، چې ارزښت یې ۳۵۰ زره افغانۍ دی او د سیمې د خلکو په مالي همکارۍ ترسره کېږي.
د یاد ولایت پوهنې رئیس محترم مولوي عبدالوکیل خالد د خلکو له همکارۍ مننه کړې او ویلي یې دي چې د خلکو په ملاتړ د تعلیمي بنسټونو د ودې او پراختیا بهیر لاپسې چټک کېږي.
د بکخېل ولسوالۍ پوهنې آمر ویلي چې د یادې مدرسې لپاره د ۶ درسي ټولګیو جوړولو چارې پیل شوې او همدارنګه به یو کتابتون هم جوړ شي، تر څو زده کوونکي د مطالعې لپاره له یو مناسب ښوونیز چاپېریال څخه برخمن شي.
د یادونې وړ ده چې څو ورځې وړاندې هم د همدې ولایت په اومنه ولسوالۍ کې د خلکو په همکارۍ د یوې مدرسې او یو محراب جومات جوړولو کارونه پیل شوي وو.