په بلخ ولایت کې د ۸ مېلیونه افغانیو په لګښت د یو باب مدرسې د ودانۍ چارې پیل شوې
د پوهنې وزارت چارواکي خبر ورکوي، په پام کې ده چې د بلخ ولایت په بلخ ولسوالۍ کې یوه دیني مدرسه جوړه شي.
د دغه ولایت پوهنې رئيس مفتي محمد شريف عثماني، د یادې مدرسې د بنسټ ډبرې اېښودلو پر مهال، د اسلام له نظره د مدارسو او ښوونځيو د جوړولو پر فضايلو تفصیلي خبرې وکړې.
نوموړي وويل: د بلخ ولسوالۍ په عبدالرحيم زيو کلي کې د قاسمیه مدرسې نوې ودانۍ د ۸ مېليونه افغانيو لګښت سره د دغې ولسوالۍ د يو مخور او علم پرور شخصيت حاجي مېکائیل له لوري جوړېږي.
د پوهنې رئیس په وينا، دغه مدرسه به په ۲.۵ جرېبه ځمکه او ۳ پوړونو کې جوړه شي، چې د درسي او اداري خونو ترڅنګ به نور اړین ملحقات هم ولري.
د پوهنې وزارت مشرتابه د هېواد د پرمختګ یوازینۍ لار د ښوونیز نظام پراختیا او له پوهنې څخه د خلکو ملاتړ ګڼي او د بلخ ولایت د اوسېدونکو په ګډون د پوهنې په برخه کې د عام ولس له مرستو مننه کوي.
