له ولایتونو څخه د پوهنې خبرونه
هلمند
پوهنې وزارت د یونیسف مؤسسې په مرسته د هلمند ولایت پوهنې ریاست ته ۲ زره او ۱۶۲ ښوونیزې بستې او قرطاسیه لېږلي دي، ترڅو د یاد ولایت د مرکز او ولسوالیو پر زده کوونکو او ښوونکو ووېشل شي.
د دې ولايت د پوهنې رياست د مسئولينو په وينا، په پام کې ده چې دغه مرستې د ټاکل شوې سهمیې پر اساس د ښوونځیو پر زده کوونکو او ښوونکو ووېشل شي.
غزني
د غزني ولایت د پوهنې رئیس مولوي میر نصیر احمد حسیني د دې ولایت له جهادي مدرسې څخه لیدنه وکړه.
په دې لیدنه کې د يادې مدرسې د اداري او تدريسي اسنادونو د کتلو ترڅنګ له درسي خونو او لیلیې څخه لیدنه وکړه او د یادې مدرسي د فعاليتونو د لا ښه والي په موخه مسئولينو ته لازمې لارښوونې وکړې.
لغمان
د لغمان ولایت د پوهنې رئیس مولوي شاه جهان ساجد د شهید عبدالوهاب لېسې د زده کوونکو د فراغت په مراسمو کې د ګډون په ترڅ کې د علم، پوهې پر ارزښت او پرمختګ خبرې وکړې او په پای کې د یادې لېسې له زده کوونکو څخه د شهادتنامو په ورکولو سره ستاینه وشوه.
د دې ولایت د پوهنې رئيس له فارغانو څخه وغوښتل، چې په دې سند بسنه ونه کړي او خپلو لوړو زده کړو ته دوام ورکړي.
