د کابل ښار اړوندو ښوونځیو د زده کوونکو د ساینسي پروژو او علمي لاسته راوړنو (المپیاډ)پای غونډه ترسره شوه

نن د کابل ښار پوهنې ریاست د غونډ په تالار کې، د ښار اړوندو ښوونځیو د زده‌کوونکو لپاره د ساینسي پروژو او لاسته راوړنو (المپیاډ) پای‌غونډې پرتمین مراسم، د پوهنې وزیر محترم الحاج مولوي حبیب الله آغا، معینانو، ځینو مرکزي رئیسانو، د کابل ښار پوهنې رئیس، مسئولینو او مېلمنو په حضور کې ترسره شول. 
غونډه د قرآن کریم د څو مبارکو آیتونو په تلاوت سره پیل شوه؛ ورپسې د کابل ښار پوهنې رئیس محترم الحاج مولوي جنت ګل عزیز په خپله پرانیستونکې وینا کې مېلمنو ته د ښه راغلاست ترڅنګ، د یادې علمي غونډې په تړاو ګډون والو ته مفصل معلومات وړاندې کړل.
همدارنګه د پوهنې محترم وزیر وویل: " ډېر د خوښۍ ځای دی، چې مونږ نن د ګرانو زده کوونکو له نوښتونو او ساینسي پروژو څخه لیدنه کوو، لله الحمد، اوسمهال په ټول هېواد کې پوره امنیت تامین او د بل هر وخت په پرتله د علمي پرمختګ لپاره پراخه زمینه برابره شوې او پر مونږ لازمه ده، چې د الله تعالی د ټولو نعمتونو شکر ادا کړو."
نوموړي زیاته کړه، چې ټکنالوژي او وسایل د اوسني ژوند جدي اړتیا ده او د ساینسي پروژو په برخه کې یې د ممتازه زده کوونکو له نوښتونو او هڅو ستاینه وکړه.
په ورته مهال، نوښتګرو زده کوونکو د پوهنې مشرتابه او چارواکو په حضور کې خپلې ساینسي پروژې نمایش ته وړاندي کړې، چې د مسئولینو له پاملرنې او تود هرکلي سره مخامخ شوې.
د مسئولینو په وینا، د کابل ښار اړوندو رسمي او خصوصي ښوونځیو ترمنځ د ساینسي پروژو او علمي لاسته راوړنو "المپیاډ" له جوړولو یې بنسټیزه موخه، په ټکنالوژۍ او ساینس برخه کې د هېواد د نویو نسلونو په ځانګړې توکه د نوښتګرو زده کوونکو هڅونه او د هغوی د علمي لاسته راوړنو پېژندل وو.
یاد مراسم ممتازو زده کوونکو ته د جایزو او ډالیو په وېشلو او دعائیې په لوستلو سره پای ته ورسېدل.