د پوهنې وزارت له لوري د ښوونکو د روزنې او مسلکي پراختیا علمي غړو اړوند ۳۵۴ کادري بستونو لپاره ډلهییزه رقابتي ازموینه واخیستل شوه
د پوهنې وزارت لخوا، د ولايتونو د مرکزونو او ولسواليو د ښوونکو د روزنې او مسلکي پراختیا علمي غړو اړوند ۳۵۴ کادري بستونو ډکولو په موخه ډلهییزه رقابتي ازموینه ترسره شوه.
ياده ازموینه د نصاب او د ښوونکو مسلکي پراختیا لوی رئیس محترم الحاج مولوي اول ګل ایوبي، د ښوونکو د مسلکي پراختیا رئیس محترم مولوي محمدابراهیم عمري او مسٸولینو په حضور کې په شفاف او منظم ډول واخیستل شوه.
په همدې مناسبت د ښوونکو د مسلکي پراختیا رئیس محترم مولوي محمدابراهیم عمري وویل چې، یاد کادري بستونه د آزادې او رڼې سیالۍ له لارې اعلان شوي، ترڅو د علمي وړتیا، مسلکي تخصص او کاري تجربې لرونکي اشخاص د ښوونیز نظام د لا پیاوړتیا او پرمختګ لپاره جذب شي.
نوموړي زیاته کړه چې د استخدام په ټولو پړاوونو کې د عدالت، شفافیت او وړتیا اصل په بشپړ ډول مراعاتېږي او هڅه کېږي چې د رقابتي ازموینو له لارې مستحق، وړ او بااستعداده کسان د علمي غړو په توګه وټاکل شي.
د چارواکو په وینا، د یادو ۳۵۴ کادري بستونو لپاره له ولایتونو څخه شاوخوا ۶۰۰ تنو نوملیکنه کړې وه، چې له هغوی څخه به د ازموینې د پایلو او قانوني مراحلو له بشپړېدو وروسته ۳۵۴ تنه مسلکي او تخصصي کسان د اړوندو بستونو لپاره غوره او وګومارل شي.
د پوهنې وزارت مشرتابه د ښوونیز نظام کیفیت لوړول، د ښوونکو مسلکي وړتياوو پیاوړتیا او د وړ بشري ځواک جذب د خپلو لومړیتوبونو له جملې څخه ګڼي او په همدې موخه د رڼو رقابتي پروسو له لارې د متخصصو کادرونو جذب ته ځانګړې پاملرنه کوي.
