د پوهنې وزارت د ښوونې او روزنې محترم معین د کابل ولایت اړوند قلعه مراد بیک عالي لېسې له آزموینو بهیر څخه لیدنه وکړه
د پوهنې وزارت د ښوونې او رزونې محترم الحاج مولوي سخاء الله سعید، په داسې حال کې چې د یاد وزارت د کارپوه محترم نجیب الله کامران او د کابل ولایت شکردرې ولسوالۍ پوهنې آمریت مسئولینو یې ملتیا کوله، د قلعه مراد بیک عالي لېسې د زدهکوونکو له څلور نیم میاشتنیو آزموینو څخه لیدنه وکړه.
د پوهنې وزارت محترم معین د یادې لېسې د رهبرۍ ټیم او ښوونکو سره تر لیدنې وروسته، له چارواکو سره د آزموینې په پروسه کې د مناسبې فضا او روڼتیا، د زدهکوونکو لپاره د سالم ښوونیز چاپېریال برابرولو په اړه مفصلې خبرې وکړې او ورپسې ټولګیو ته لاړ او د زدهکوونکو آزموینې پروسه یې له نږدې وڅاره.
د دغې لیدنې پرمهال د شکردرې ولسوالۍ پوهنې چارواکو او د لېسې مشرتابه هر یو د پوهنې قدرمن معین ته ښه راغلاست ووایه او ډاډ یې ورکړ چې د تل په څېر به خپلې دندې په صادقانه او وفادارۍ سره د اصولو سره سمې ترسره کړي او د زدهکوونکو د پوهې کیفیت لالوړولو په برخه کې به نه ستړې کېدونکې هلې ځلې کوي.
