د پوهنې وزارت اداري لوی رئیس کاپیسا ولایت ته رسمي سفر وکړ
د پوهنې وزارت اداري لوی رئیس مفتي شفیع الله «منصور» د مراجعینو لپاره د لازمو آسانتیاوو برابرولو او د پوهنې په برخه کې د نورو مسایلو په موخه، کاپیسا ولایت ته ولاړ.
نوموړي یاد ولایت ته د رسېدو پر مهال، د پوهنې له ریاست څخه لیدنه وکړه او د دغه ولایت د پوهنې له رئیس مولوي محمد فرید حقاني سره یې په کتنه کې، د خپل سفر د موخو د پلي کولو په تړاو خبرې اترې وکړې.
د پوهنې وزارت اداري لوی رئیس د کاپیسا له پوهنې مسئولينو او کارکوونکو څخه وغوښتل چې د مراجعينو کارونه دې په ټاکلي وخت ترسره کړي، تر څو د هغوی د وخت ضایع کېدو مخنیوی وشي.
دغه راز د یاد ولایت پوهنې رئیس د پوهنې وزارت پلاوي ته د ښه راغلاست ترڅنګ، د مراجعینو لپاره د لازمو آسانتیاوو برابرولو ډاډ ورکړ او د پوهنې ریاست مسئولین او کارکوونکي یې د دې چارې په عملي کولو کې ژمن وبلل.
