د داخل خدمت ښوونکو او اداري کارکوونکو فراغت غونډه ترسره شوه
د پوهنې وزارت د ښوونې او روزنې معینیت په همغږۍ، د سیدجمال الدین افغان د ښوونکو د روزنې او مسلکي پراختیا مرکزي زون آمریت لخوا، د کابل ښار اړوندو ښوونځیو د داخل خدمت( ۱۲ پاس ښوونکو او اداري کارکوونکو) فراغت غونډې پرتمین مراسم، د پوهنې وزارت د ښوونیز نصاب او د ښوونکو مسلکي پراختیا لوی رئیس محترم الحاج مولوي اول ګل ایوبي، د ښوونکو د مسلکي پراختیا رئیس محترم مولوي محمد ابراهیم عمري او مسئولینو په حضور کې ترسره شول.
لومړی د پوهنې وزارت د نصاب او د ښوونکو مسلکي پراختیا لوی رئیس ګډون والو ته د ښه راغلاست او مبارکۍ ترڅنګ، د هېواد او ټولنې په هراړخیز پرمختګ کې د علم او پوهې په ارزښت خبرې وکړې او له ښوونکو یې وغوښتل چې خپل زده کړي مهارتونه په تعلیمي مرکزونو کې پلي کړي.
ورپسې د پوهنې وزارت د ښوونکو مسلکي پراختیا رئیس د خپلې وینا پرمهال، د ښوونکو او منسوبینو پر تحصیلي پیاوړتیا او مسلکي پراختیا ټینګار وکړ او زیاته یې کړه، چې له دې لارې یې د ټول هېواد په کچه شاوخوا ۳۵۰۰ تنه ۱۲ پاس داخل خدمت ښوونکي او منسوبین د ۱۴ پاس په سویو فارغ کړي، تر څو په تعلیمي مرکزونو کې تعلیمي کیفیت لاپسې لوړ شي.
د یادونې وړ ده، چې په دغه ښوونیز او روزنیز پروګرام کې د کابل ښار ښوونځیو شاوخوا ۷۰ تنو ۱۲ پاس ښوونکو او منسوبینو ګډون کړی و، چې په دیني علومو، ساینس، ریاضي او ټولنیزو څانګو کې تر دوه کلنو زده کړو وروسته د ۱۴ پاس په سویو فارغ شول او په پای کې د پوهنې مسئولینو لخوا کډون والو ته تصدیق پاڼې هم ورکړل شوې.
