د پوهنې وزارت د دعوت او ارشاد ریاست له کړنو "اوونیز راپور"
د پوهنې وزارت د دعوت او ارشاد د رئیس محترم الحاج مولوي جمعه خان "سروري" په لارښوونه، تېره اوونۍ د یاد ریاست یو څارنیز ټیم، د کابل ښار ، اتمې او دولسمي تعلیمي ناحيو اړوندو ۱۶ بابه خصوصي تعلیمي ښونیزو مرکزونو له مدیرانو او مسئولینو سره وکتل.
په یادو لیدنو کې د پوهنې وزارت د دعوت او ارشادریاست مسئولینو له ټاکل شوي نصاب څخه څارنه وکړه او هغوی ته يې د دعوت او ارشاد د نصاب تدریس په هکله لازمي سپارښتني وکړې.
همداراز د پوهنې وزارت مرکزي هستې ټولو کارکوونکو ته د دیني درسونو لړۍ هم په نورمال ډول روانه وه.
په ورته مهال د ولایتونو له پوهنې ریاستونو او د کابل ښار پوهنې ریاست څخه ترلاسه شوي راپورونه ښيي چې؛
په تېره اوونۍ کې له ټاکل شوي مهالوېش سره سم، د ښوونیزو مرکزونو منسوبینو ته د دعوت او ارشاد درسونو دوام درلود؛ لکه د پخوا په څېر، په مرکزي هسته کې د یو شمېر ریاستونو د کارکوونکو وضعیت له نږدې وارزول شو او هغوی ته اړینې سپارښتنې وشوې.
همدارنګه د پوهنې وزارت د دعوت او ارشاد رئیس تېره چهارشنبې ورځ د یو رسمي سفر په ترڅ کې بغلان ولایت ته لاړ او هلته یې د دعوت او ارشاد له ولایتي مسئول مفتي سعیدالرحمن حقاني او مسئولینو سره په کتنه کې د دعوت او ارشاد اصول، کړنلارې او لارښوونې هغوی ته تشرېح کړې او ولایتي ادارې ته یې له خپل لوري د هر ډول همکاریو ډاډ ورکړ.
د یادونې وړ ده چې د یاد رسمي سفر پر مهال، د پوهنې وزارت د دعوت او ارشاد محترم رئیس له لوري، د بغلان ولایت له بغلان زیبا، اسلام قلعه او سیدجمال الدین ښوونځيو څخه هم څارنه ترسره او منسوبینو ته لازمې سپارښتنې وشوې.
