په لوګر کې د سامع زده کوونکو کلنۍ ازموینې پیل شوې

 لوګر ولایت کې د پوهنې وزارت د لارښوونې له مخې د سامع زده کوونکو د کلنۍ ازموینې د اخیستلو بهیر په رسمي ډول پیل شو. 

د یادې ازموینې د پیل په مراسمو کې د پوهنې رئیس مولوي جنت ګل عزیز، تدریسي مرستیال مولوي عبیدالله هشام، د اسلامي زده کړو مرستیال صدیق الله عزیزي ، د نظارت آمر عنایت الله خالد، د ساینس او ښوونیزې ټکنالوژۍ آمر محمد یعقوب اورمړ او د ازموینې ګډونوالو برخه اخیستې وه. 

د لوګر د پوهنې رئیس مولوي جنت ګل عزیز د یادې ازموینې د پیل په مراسمو کې د ازموینې له ګډونوالو د ازموینې د ښه نظم ساتلو او د ازموینې له مؤظفې کمېټې یې د ازموینې د روڼتیا غوښتنه وکړه.  

د دې ازموینې د اخیستلو بهیر د پوهنې وزارت د نوې را لېږل شوې کړنلارې له مخې پیل شو،چې پنځلس ورځې به دوام وکړي.

په یاده ازموینه کې په شرایطو برابر شاوخوا ۶۵ زده کوونکو برخه اخیستې ده، چې له ۷ ټولګي څخه نیولې تر۱۲ټولګي پورې سامع اوهغه مجاهدین زده کوونکي دي،چې د امنیتي ستونزو له امله محروم پېژندل شوې دي. 

سامع ازموینې له هغو زده کوونکو څخه اخیستل کېږي، چې هر کال د عمر د لوړوالي، د اقتصادي او نورو ستونزو له امله خپلو زده کړو ته دوام ورکولی نه شي، د تعلیمي کال د پیل په لومړیو کې یې ځانونه له ښوونځي څخه منفک کړي 
وي او بیا د تعلیمي کال په پای کې دغه ازموینه ترې اخیستل کېږي.