ایجاد کورس سواد آموزی برای محبوسین در ولایت نیمروز

وزارت معارف، نیمروز: اخیرآ برای ۳۰۰ تن محبوسین زندان ولایت نیمروز ازطرف ریاست معارف ولایت نیمروز کورس‌های سواد آموزی ایجاد وفعال گردیدند.

در مراسم گشایش کورس‌های یاد شده مسعود نوری رییس معارف ولایت نیمروز ضمن خوش آمدید حاضرین ومهمانان، مبارزه علیه بی‌سوادی را در کشور یکی از شاخص‌های مهم برنامه‌های وزارت معارف توصیف نموده گفت: ریاست معارف ولایت نمیروز در همکاری با مقام محترم ولایت وسایر نهادهای دولتی متعهد است که در راستای تحقق پلان‌های مطروحه وزارت معارف تلاش مضاعف نماید.

موصوف از همکاری‌های مسوولان زندان ولایت نیمروز قدردانی نموده و از سایر ادارات و اهالی شریف ولایت مذکور خواست تا در این راستا با ریاست معارف همکار باشند.

متعاقبآ چند تن از مسوولان محابس وسایر ادارات اقدامات ریاست معارف را ستوده وغرض تحقق آن وعده همکاری سپردند.

در پایان برای ۳۰۰ تن از مشمولان کورس‌های سواد آموزی کتب درسی و قرطاسیه باب توزیع گردید.

شایان ذکر است که امور تدریس کورس‌های متذکره از طرف زندانیان باسواد پیش برده می‌شود.