په نیمروز ولایت کې د بندیانو لپاره د لیک لوست کورسونه جوړ شول
د پوهنې وزارت، نیمروز: پدې وروستیو کې، د نیمروز د پوهنې ریاست لخوا د نیمروز په زندان کې د ۳۰۰ بندیانو لپاره د لیک لوست کورسونه جوړ او فعال شول.
د یادو کورسونو د پرانستلو په مراسمو کې، د پوهنې رییس مسعود نوري د غونډې ګډونوالو او میلمنو ته ښه راغلاست وویل په هیواد کې د بې سوادۍ پر وړاندې مبارزه د پوهنې وزارت د برنامو یو مهمه برخه وبله او ویې ویل: د نیمروز د پوهنې ریاست د ولایت د مقام او نورو دولتي ادارو په مرسته ژمن دې چې د پوهنې وزارت لخوا د وړاندیز شوي پلانونو عملي کولو او لاسته راوړلو په موخه خپلو هڅو ته دوام ورکړي.
د پوهنې رییس د نیمروز ولایت د محبس د مسؤلینو د همکارۍ قدرداني وکړه او د دغه ولایت له نورو دولتي ادارو څخه یې وغوښتل چې په دې برخه کې د پوهنې له ریاست سره همکاري وکړي.
وروسته د محبس او نورو ریاستونو چارواکو د پوهنې ریاست د کړنو ستاینه وکړه او د دې موخو د سرته رسولو لپاره یې د همکارۍ ژمنه وکړه.
په پای کې، د پوهنې رییس لخوا د سواد زده کړې کورسونو ۳۰۰ تنه زده کونکو ته درسي کتابونه او قرطاسیه وویشل شول.
د یادونې وړ ده چې د دې کورسونو تدریس د لوستو بندیانو لخوا ترسره کیږي.
