ارزګان کې ښوونکو ته روزنیز ورکشاپ جوړ شو
د پوهنې وزارت_ارزګان: د ارزګان ولایت مرکز اړوند د ښوونځیو ښوونکو ته د مسلکي ښوونې او روزنې تر نامه لاندې د ظرفیت لوړونې ۳ ورځنۍ ورکشاپ جوړ شو.
دغه ورکشاپ د پوهنې ریاست له لوري جوړ شوی، چې د شهري آمریت اړوند د لومړنیو او منځنیو ښوونځیو ښوونکي پکې برخه اخیستي، د ورکشاپ ګډون والو ته به د علمي او مسلکي ظرفیت لوړونې، د درسي میتودونو د زده کړې او د نویو ښوونیزو مېتودونو په اړه به ګډونوالو ته لازم مالومات ورکړل شي.
د ارزګان د پوهنې رییس میرزا محمد سالارزي ګډونوالو ته وویل چې له دې فرصت څخه د سالمې استفادې تر څنګ د درسي کیفیت ته هم زیاته توجه وشي او هم یې له استادانو غوښتنه وکړه چې په ټاکلي وخت زده کړو ته دوام ورکړي.
نوموړي زیاته کړه، د یادو روزنیزو ورکشاپونو لړۍ د ارزګان ولایت نورو سیمو ته هم وغځوي، چې پرمټ به یې ګڼ شمېر ښوونکي له مسلکي ښوونې او روزنې برخمن شي.
