په خوست کې د نجونو د څلورو ښوونځیو د ساینسي تجربو، لاسي صنایعو او موډولونو نندارتونونه جوړ شول
د پوهنې وزارت_خوست: د خوست ولایت د نجونو د څلورو ښوونځیو زده کوونکو د ساینسي تجربو، لاسي صنایعو او موډولونو نندارتونونه جوړ کړل.
دغه نندارتونونه د پوهنې ریاست د ساینس مرکز په نوښت د مرکز او مندوزیو ولسوالۍ اړوند د بي بي خدیجه، صدیقي روهي، پاینده خیلو او بي بي خدیجې د پټارې کلي د نجونو په ښوونځیو کې جوړ شوی ؤ چې د سیمې قومي مشرانو، دیني عالمانو او د زده کوونکو والدینو پکې ګډؤن کړی ؤ.
پوهنې رئیس نصیر احمد روښان د بي بي خدیجې لیسې د ساینسي تجربو او د زده کوونکو لوري د جوړ شویو موډلونو د نندارتون د پرانیستې پر مهال وویل ، اوس تر بل هر وخت په خوست ولایت کې د نجونو پر عملي زده کړو تمرکز زیات شوی دی، سږ کال په لسګونه ښوونځیو دا ډول پروګرامونه جوړ شول او د لړۍ لا هم دوام لري.
ده وویل، هنرونه او موډولونه په یوه ټولنه کې ډېر ارزښت لري او یوې ټولنې په مثبت تغیر کې اغیزناک رول لري .
ښاغلی روښان زیاته کړه ، نجونې د ټولنې اکثریت تشکلیوي، حق لري چې د هر ډول تعلیمي اسانتیاوو زمینه ورته برابره شي او د ټولنې په مثبت بدلون کې عملا برخه واخلي.
همدارنګه د دغه ښوونځیو زده کوونکو خوښي ښوده چې دا ډول ګټورو برنامو زمینه ورته برابریږي، دوی ویل که امکانات ورته برابر شي دغه موډلونه به په عادي ژوند کې د استفادې لپاره هم اماده کړي .
د زده کوونکو له لوري ګډون والو ته تجربې په مفصل ډول تشریح اوعلمي کړل شوه . پروګرامونو په پای کې دغه ښوونځیو ته د ساینسي تجربو لپاره د لابراتوار لسګونه قلمه مواد ورکړل شول.
