په هلمند ولايت کې د یو باب ښوونځي نوې ودانۍ ګټې اخیستنې ته وسپارل شوه

د هلمند ولایت ناومیش ولسوالۍ کې د نوشور منځني ښوونځي د ودانۍ چارې بشپړې او د پوهنې مسئولینو، علماوو، د ملکي او نظامي ادارو استازو او مشرانو په ګډون، د یو لړ مراسمو په ترڅ کې ګټې اخیستنې ته وسپارل شوه.
یاد منځنی ښوونځی د سیمې د خلکو او د پوهنې مینه والو په مرسته، د ۶۰۰ زره افغانیو لګښت سره په یو نیم جرېب ځمکه کې جوړ شوی، چې ۱۲ درسي ټولګي له نورو اړینو ملحقاتو سره لري.
د هلمند پوهنې رئیس د ځوانانو لپاره د زده کړې د ترلاسه کولو په برخه کې د ښوونیزو بنسټونو د رول په اړه تفصیلي خبرې وکړې او د هېوادوالو د وطن دوستۍ او ښوونې او روزنې له احساس څخه يې د مننې تر څنګ، له خلکو وغوښتل، تر څو خپل ماشومان ښوونځيو او مدارسو ته د د زده کړې لپاره واستوي.
مسئولينو او ويناوالو د یاد ښوونځي په جوړېدو خوښي وښوده او د هېواد د پوهنیز نظام په پرمختګ يې ټينګار وکړ.