د پوهنې وزارت د اسلامي زدهکړو معینیت لپاره د اسلامي ا/مارت د عالي مقام فرمانونو اړوند سیمینار ترسره شو
د پوهنې وزارت د اسلامي زده کړو معینیت کارکوونکو لپاره د ټولنې د ناخوښو او بې ځایه دودونو مخنیوي په اړه یو سیمینار ترسره شو، چې د افغانستان اسلامي ا/مارت د عالي مقام مشرتابه فرمانونه پکې روښانه او توضېح شول.
په یاد سیمینار کې د پوهنې وزارت د استعدادونو ارزونې رئیس مفتي عبدالولي «سداد» ګډون والو ته د ناخوښو او بې ځایه دودونو لکه؛ په ودونو، جشنونو، د ماتم مجلسونو، له حج او عمرې څخه راستنېدو پرمهال د زیاتو لګښتونو په اړه مفصل او جامع معلومات وړاندې کړل او د فرمان ټول مفردات یې په تفصیل سره تشرېح کړل.
نوموړی وويل: داسې نامناسب او ناخوښه کړنې د اسلامي ارزښتونو او زموږ د ملي کلتور سره په ټکر کې دي، نو څنګه موږ کولی شو دغه ډول راوجونه د اصلاح، عقل او اېمان پر مټ له ټولنې څخه لرې کړو؟ له دغه سیمینار څخه مو موخه یوازې د فرمانونو تشرېح کول نه دي؛ بلکې د داسې ټولنې جوړول دي چې پکې سنت او شریعت پر بشپړ ډول پلی شي.
د سیمینار ګډون والو د دغه ډول علمي غونډو له تنظیم څخه هرکلی وکړ، کوم چې د عامه ذهنونو روښانه کولو او د اسلامي شریعت سره سم د یوې پاکې ټولنې په جوړولو کې اغېزمن تمامېدای شي.
