د پوهنې وزارت د غونډو په تالار کې ښوونکو لپاره علمي، اصلاحي او روزنیزه برنامه جوړه شوه
د پوهنې وزارت د امر بالمعروف او نهی عن المنکر قانون د تنفیذ مرکزي هیئت او د دعوت او ارشاد ریاست له لوري، د فکري او اخلاقي اصلاح، سالمې ښوونې او روزنې او د اسلامي ارزښتونو د پیاوړتیا په موخه، یو ورځنۍ علمي، اصلاحي او روزنیزه برنامه جوړه شوه.
په پیل کې د پوهنې وزارت د مقام دفتر لوی رئیس محترم شیخ محمد طاووس طارق ګډونوالو ته د ښه راغلاست ترڅنګ، په اسلامي نظام کې د امر بالمعروف او نهی عن المنکر پر اهمیت خبرې وکړې او د اسلامي ارزښتونو د پلي کېدو او د ټولنې د اصلاح په برخه کې یې د دغه اصل پر بشپړ تطبیق او مهم رول ټینګار وکړ.
ورپسې د پوهنې وزارت د دعوت او ارشاد رئیس محترم الحاج مولوي جمعه خان سروري، د جماعت د لمانځه پر ارزښت او فضیلت خبرې وکړې او له ګډونوالو یې وغوښتل، چې د جماعت لمانځه ته په پاملرنې سربېره، په خپلو کاري او ښوونیزو چاپېریالونو کې د دې مهمې اسلامي فریضې د ادا کولو فرهنګ پیاوړی کړي.
همدارنګه، نورو ویناوالو او ښوونکو په سالمه ښوونه او روزنه کې د ښوونکي د مسوولیت، د سیرت او صورت د سمون او د عالیقدر امیرالمؤمنین حفظه الله تعالی د ۱۷مې ګڼې فرمان په اړه علمي ویناوې او اړین معلومات وړاندې کړل.
په پای کې د پوهنې وزارت د دعوت او ارشاد ریاست د ولایتي چارو د همغږۍ مسوول محترم مولوي بسم الله حسان د خپلې وینا پرمهال وویل، چې ښوونکی یوازې د علم لېږدوونکی نه، بلکې د زدهکوونکو د فکري، اخلاقي او شخصيتي ودې په برخه کې هم مهم مسوولیت لري؛ نو اړینه ده چې د اخلاص، امانتدارۍ، ښو اخلاقو او مسوولیتپالنې له مخې د خپلو زدهکوونکو لپاره غوره بېلګه واوسي.
دغه پرتمینه علمي غونډه په مبارکې دعائیې سره پای ته ورسېده.
