په سرپل ولايت کې د يو باب ښوونځي د نوې ودانۍ بنسټ ډبره کېښودل شوه
د سرپل ولایت صیاد ولسوالۍ اړوند علتو منځني ښوونځي لپاره د درې خونېزې ودانۍ جوړولو بنسټ ډبره کېښودل شوه.
دغه ودانۍ د ۳۵۰ زره افغانیو په لګښت، د سیمې د اوسېدونکو په مالي ملاتړ او همکارۍ جوړېږي.
د صیاد ولسوالۍ پوهنې آمر د یادې ودانۍ بنسټ اېښودنې په مراسمو کې د پوهنې پر اهمیت او د ښوونیز نظام د پیاوړتیا په برخه کې د خلکو د همکارۍ پر ارزښت خبرې وکړې او د ښوونځي د ودانۍ په جوړولو کې یې د سیمې د خلکو له مرستې څخه مننه وکړه.
