د کابل ښار اړوندو ښوونځيو د لسمو ټولګيو له زده کوونکو څخه د اخيستل شويو" يو شان او متمرکزه معياري ازموينو" پايلې له اړوندو ادارو سره شريکې شوې
د پوهنې وزارت د کيفيت تضمين معينيت په نوښت، تېر کال د کابل ښار په کچه د ا/مارتي او خصوصي ښوونځيو د لسمو ټولګيو له شاوخوا ٣٧٠٠٠ تنه زده کوونکو څخه يو شان او متمرکزه معياري ازموينې واخيستل شوې، چې نن يې پايلې د پوهنې وزارت د کيفيت تضمين د معين محترم الحاج مولوي عبدالخالق صادق، ځينو مرکزي رٸيسانو، مسوولينو، د ښوونې او روزنې کارپوهانو او د ښوونځيو د استازو په حضور کې له اړوندو ادارو سره شريکې شوې٠
په همدې مناسبت د پوهنې وزارت ساينس مرکز رياست د غونډو په تالار کې د جوړو شويو مراسمو پرمهال، مسوولينو د يادو ازموينو د راتلونکي بهير پلي کولو، پراختيا او لا پياوړتيا په اړه مفصلې مشورې ترسره او نظرونه تبادله کړل.
همدارنګه د پوهنې وزارت د کيفيت تضمين محترم معين، د يو شان او متمرکزه معياري ازموينو د ښه تطبيق په برخه کې له ټولو ښکېلو ادارو څخه د مننې او قدردانۍ ترڅنګ، ټينګار وکړ، چې دغه پروسه د پوهنيز کيفيت په لوړوالي کې کليدي نقش لري٠
د چارواکو په خبره، د پورته ذکر شويو ازموينو اساسي موخه د ښوونيز او روزنيز کيفيت پياوړتيا، د ارزونې په بهير کې د روڼتيا بشپړ تامين او په نتايجو کې له هر ډول لاسوهنې مخنيوی بلل شوى دى.
د يادونې وړ ده، چې د دغو ازموينو لړۍ به نه يوازې په کابل، بلکې د هېواد نورو ولايتونو ته هم وغځول شي، ترڅو د يو واحد، عادلانه او اغېزمن څارنيز سيسټم بنسټ کېښودل شي.
