د مالیې وزارت د عوایدو لوی ریاست چارواکو د پوهنې وزارت له مسئولینو سره وکتل

د مالیې وزارت د عوایدو لوی رئیس، یو شمېر مسئولینو، تخنیکي ټیم او همدارنګه د پوهنې وزارت له لوري د اسلامي زده‌کړو معین، د مالي او حسابداري رئیس او یو شمېر رئیسانو ترمنځ، د معیاري ښوونیزو چوپړونو وړاندې کولو، د سیسټمونو رامنځته کولو او د عوایدو له فرصتونو څخه د اغېزمنې استفادې په اړه ناسته ترسره شوه.
یاده ناسته د قرآن کریم د څو مبارکو آیتونو په تلاوت پیل شوه؛ ورپسې د پوهنې وزارت د اسلامي زده‌کړو معین محترم الحاج مولوي کرامت الله آخندزاده مېلمنو ته د ښه راغلاست ترڅنګ، د مالیې وزارت له هر اړخیزو همکاریو مننه وکړه.
 نوموړي د سیسټمونو رامنځته کولو پر اهمیت خبرې وکړې او زیاته یې کړه چې، نظامونه هغه وخت پایداره پاتې کېږي، کله چې ټولې ادارې په همغږۍ سره فعالیت وکړي.
ورپسې د مالیې وزارت د عوایدو لوی رئیس د پوهنې وزارت مسئولینو ته د بشپړې همکارۍ ډاډ ورکړ او ویې ویل: دوی چمتو دي چې د پوهنې وزارت اړوندو برخو کې، لکه د تجهیزاتو برابرولو، د استادانو د کمښت ستونزې حل کولو او یا هم نورو اړوندو برخو کې هر ډول لازمه همکاري ترسره کړي.