د پوهنې وزارت محترم ستر سلاکار جوزجان ولایت ته سفر وکړ
د پوهنې وزارت ستر سلاکار محترم سید غیاث الدین آغا په یوه کاري سفر جوزجان ولایت ته ورسېد او د یاد ولایت له پوهنې رئیس محترم الحاج مولوي لعلجان راشد، د مرکز او ولسوالیو د ښوونځيو له آمرینو او کتابتونونو له مدیرانو سره یې وکتل او د کتابتونونو د وضعیت، د موجوده کتابونو د محتوا او د پوهنې وزارت د پالیسیو پلي کولو په اړه یې بحث او نظرونه تبادله کړل.
په دې غونډه کې، د پوهنې رئیس د یاد پلاوي د هرکلي په ترڅ کې زیاته کړه چې د پوهنې وزارت د لوړ پوړي سلاکار سفر د همدغه ولایت د ښوونځیو د کتابتونونو د ارزونې لپاره ترسره شوی او ټول اړوند چارواکي مکلف دي چې په دې برخه کې اړینې همکارۍ وکړي.
ورپسې د پوهنې وزارت محترم پلاوي په خپله وینا کې وویل چې په تېرو وختونو کې ځینې غلط کتابونه او نصابونه د زدهکوونکو د فکري انحراف او غیر سالمې روزنې لامل شوي وو؛ نو د محترم مشرتابه د لارښوونې پر بنسټ، پرېکړه وشوه چې د ملک ټول کتابتونونه وڅېړل شي او له کتابتونونو څخه هغه نامطلوب کتابونه راټول شي کوم چې له اسلامي ارزښتونو سره په ټکر کې وي.
