بدخشان ولایت کې د ۱.۳ مېلیونه افغانیو په لګښت یو لومړنی ښوونځی جوړېږي
د ملا عبدالعلي لومړني ښوونځي بنسټ ډبره د بدخشان ولایت کوهستان ولسوالۍ اړوند د شپوی بالا او شپوی پایین کلیو په مرکز کې د سیمه ییزو چارواکو، قومي مشرانو او سیمهییزو اوسېدونکو په حضور سره د خلکو په مرسته د ۱ مېلیون ۳۰۰ زره افغانیو څخه په زیات لګښت کېښودل شوه.
د یاد ښوونځي بنسټ اېښودلو په مراسمو کې، د کوهستان ولسوالۍ پوهنې آمر وویل چې دغه ښوونځی شپږ درسي ټولګی، یوه اداري خونه او یو کتابتون لري، چې په پنځه جرېبه ځمکه کې به جوړ شي.
د بدخشان ولایت پوهنې رئیس محترم الحاج مولوي محمد طاهر جواد د دغې پروژې د پیل په مناسبت په یوه پیغام کې وویل چې د پوهنې په برخه کې د خلکو صادقانه ګډون د یوې باخبره او پرمختللې ټولنې د ملا تیر جوړوي او موږ د شپوی بالا او پایین کلیو شریفو خلکو له دغه نېک اقدام څخه په کلکه هرکلی کوو.
