په لوګر ولایت کې د ۷۵ مېلیونه افغانیو په لګښت د ۷ بابه ښوونځیو لپاره نوې ودانۍ جوړې شوې
د لوګر ولایت په برکي برک، چرخ او خروار ولسوالیو کې، د پادخاب روغني، برکي، ګرمابه، محمدي، حاجي بزرګ، شمشر ګنګی او شیخ موسی ښوونځیو لپاره د ۷۵ مېلیونه افغانیو په لګښت نوې ودانۍ جوړې او ټاکل شوې ده چې په راتلونکو څو ورځو کې د پوهنې مسئولینو له خوا د یو لړ رسمي مراسمو په ترڅ کې ګټې اخیستنې ته وسپارل شي.
د پورته ذکر شويو ښوونځيو ودانۍ په یو پوړیز ډول د یو کال په اوږدو کې د یوې همکارې ادارې په مالي ملاتړ سره رغول شوې دي.
همدارنګه هره ودانۍ یوه اداري خونه، ۶ درسي ټولګي، د لاس مینځلو ځانګړې ساحې، احاطوي دېوال، د څښاک پاکو اوبو لپاره ژورې څاګانې او د لمریزې برېښنا سیسټمونه لري.
د یادونې وړ ده چې د دې ښوونځیو په پرانیستلو سره به د ۲۵۰۰ تنو څخه زیاتو زدهکوونکو لپاره مناسب تعلیمي چاپېریال چمتو شي.
