د پوهنې وزارت سرپرست په رسمي سفر کندهار ولایت ته ولاړ
د پوهنې وزارت سرپرست الحاج مولوي حبیب الله آغا او ورسره مل پلاوي د کندهار ولایت د تعلیمي وضعیت ارزونې او ځینو رسمي چارو ترسره کولو په موخه یاد ولایت ته د خپل رسمي سفر په ترڅ کې، د مسئولینو سره د لیدنو سربېره، د همدغه ولایت د عظیم الله، محمود طرزي او تجربوي عالي لېسو څخه لیدنه او ارزونه وکړه.
د پوهنې وزارت سرپرست د یادو لېسو د اداري، تدریسي او چاپېریالي چارو بیاکتنې پرمهال، اړوندو مسئولینو او ښوونکو ته په جلا جلا غونډو کې د افغانستان.ا.ا. د عالي مقام د مشرتابه د فرمانونو، سپارښتنو او دامربالمعروف او نهی عن المنکر له قوانینو یادونه وکړه او له هغوی یې وغوښتل چې د یادو فرمانونو او قوانینو په پلي کولو کې په بشپړه توګه هڅې وکړئ او په تطبیق کې یې جدي واوسي.
همدارنګه نوموړي د هېوادبچیانو د سالمې ښوونې او روزنې کیفیت پر لاپیاوړتیا ټینګار وکړ.
بلخوا؛ د یادو لېسو چارواکو او ښوونکو د پوهنې وزارت د مشرتابه له سفر څخه د خوښۍ ترڅنګ ډاډ ورکړ، چې دوی به د اسلامي نظام د مشرتابه او پوهنې وزارت د رهبرۍ پرېکړې او لارښوونې په دقیق او درست ډول پلي کړي او د هېواد د نوي نسل د زده کړې په برخه کې به خپلې هڅې په خورا شفقت او بشپړ اهتمام سره لاپسې زیاتې کړي.
د همدغو لیدنو په پای کې، سیمه ییزو چارواکو د وزارت مشرتابه سره یو لړ نظرونه، وړاندیزونه او ستونزې شریکې کړې، چې د پوهنې رهبرۍ له لارې ورسره د حل په برخه کې د همکارۍ ژمنه وشوه.
