د پوهنې وزارت کارکوونکو لپاره د برېښنایي انرژۍ سپمولو په اړه سیمینار پرانیستل شو
د پوهنې وزارت له لوري د اوبو او انرژۍ وزارت سره په همکارۍ، د یاد وزارت مرکزي کارکوونکو لپاره د غیر ضروري برېښنا لګښت په اړه د پوهاوي سیمینار جوړ شو، تر څو اړوند منسوبین د برېښنایي انرژۍ سمې کارونې او ساتنې ته جدي پاملرنه وکړي.
په پیل کې د پوهنې وزارت د خدماتو رئیس استاد حبیب الله خالد ګډون والو ته د ښه راغلاست تر څنګ، د اوبو او انرژۍ وزارت په ځانګړې توګه د یاد وزارت د متخصصینو له همکارۍ ستاینه وکړه، چې په ترڅ کې به یې د پوهنې وزارت مسئولینو ته د برېښنا د غیر ضروري لګښت څخه د مخنیوي او سپمولو په تړاو معلومات ارایه شي.
نوموړي د خپلو خبرو پرمهال، په دفترونو او ادارو کې د برېښنا د بې ځایه لګښت او ضایع کېدو په تړاو ګډون والو ته هراخیزه وینا وکړه او له هغوی یې وغوښتل چې د برېښنا له بې ځایه لګښت څخه د مخنیوي او سپما برخه کې له هغو مېتودونو او لارو چارو څخه اعظمي ګټه پورته کړي، کوم چې د اوبو او انرژۍ وزارت د روزونکو لخوا د یو ورځني سیمینار په جریان کې د علمي پریزنټیشنونو له لارې وړاندې کېږي.
ورپسې د همدغه سیمینار لومړی پرېزنټېشن د اوبو او انرژۍ وزارت د مثمریت څانګې متخصص انجنیر محمد فردین هاشمي لخوا، د برېښنايي انرژۍ مؤثریت په برخه کې وړاندې شو، او په پلان کې ده، چې دغه سیمینار به د اړوندو نورو موضوعاتو په برخه کې هم دوام ولري.
