په دایکنډي ولایت کې له ۱۲۰۰ تنو م/جاهدینو څخه د سويې د تثبيت آزموینه واخیستل شوه
د پوهنې وزارت د اساسي او ثانوي زده کړو ریاست د ځانګړې قانوني کړنلارې پر بنسټ، د ا. ا. ا د م/جاهدينو لپاره د زده کړو د آسانتیاوو برابرولو او په رسمي ښوونځیو کې د هغوی شاملولو په موخه، دایکنډي ولایت کې له سلګونو م.جاهدینو څخه د سويې د تثبيت آزموینه واخیستل شوه.
د دایکنډي پوهنې رئیس مولوي عبدالواحد واحديار وايي: دا نوماندان چې شمېر يې تر ۱۲۰۰ تنو پورې رسېږي، په ج/هادي فعاليتونو کې د بوختياوو له امله د زده کړو له بهیر څخه بې برخي پاتې شوي وو؛ چې اوس کولای شي، له شته فرصتونو څخه په استفادې خپلې نیمګړې زده کړې بشپړې کړي.
نوموړي زیاته کړه، د یادې پروسې بریالي نوماندان به د هغوی له سویې سره سم په ښوونځیو کې شامل شي.
د آزموينې ګډون والو هم دوی ته د زده کړو لپاره د لازمو ښوونیزو آسانتیاوو په برابرېدلو خوښي څرګنده او له نورو م/جاهدينو یې وغوښتل چې له شته فرصتونو څخه په استفادې د دیني او عصري علومو په برخه کې خپلو زده کړو ته دوام ورکړي.
تر دې وړاندې هم د پوهنې وزارت د اساسي او ثانوي زده کړو رياست، له سلګونو م/جاهدينو او راستنېدونکو مهاجرينو څخه د سويې د تثبيت آزموينه اخيستې او د زده کړو د دوام په موخه يې په مطلوبو ټولګيو کې شامل کړي دي.
