د پوهنې وزارت د خدماتو رئیس په رسمي سفر کونړ ولایت ته ولاړ
د پوهنې وزارت د خدماتو د رئیس استاد حبیب الله خالد په مشرۍ د یاد وزارت رسمي پلاوی په یو رسمي سفر کونړ ولایت ته ورسېد. په پیل کې پلاوي د یاد ولایت له پوهنې رئیس او مسئولینو سره په کتنه کې د بېلابېلو پوهنیزو مسایلو په اړه تفصیلې خبرې وکړې. د پوهنې وزارت پلاوي د خپل سفر اساسي موخه، د پوهنې د بودیجې د مصرف ارزونه، د تدارکاتي پروژو، د ښوونکو د تدریسي ساعتونو تنظیمول، د کار او املاکو په برخه کې د بیارغونې او ساختماني پروژو وضعیت له نږدې څېړل وبلل. له بلې خوا د کونړ پوهنې رئيس ياد پلاوي ته د ښه راغلاست پرمهال څرګنده کړه، چې دغه ناسته د پوهنې د کيفيت لاښه والي او د پوهنې په برخه کې د شته اداري او مالي ستونزو د حل په موخه جوړه شوې وه او د پلاوي د سفر د موخو د تطبيق په برخه کې یې د همکارۍ ډاډ ورکړ.
