د کابل ښار د یو شمېر ښوونځیو د زده کوونکو ترمنځ د ا.مارت پېژندنې رقابتي آزموینه واخیستل شوه
د کابل ښار د رسمي او خصوصي ښوونځیو د شاوخوا ۳۰۰۰ تنو زده کوونکو ترمنځ د ا.مارت پېژندنې کتاب رقابتي آزموینه، د پوهنې رئیس قاري عبدالباسط حقاني، یو شمېر ښوونیزو ناحیو آمرینو، علماءکرامو او ښوونکو په حضور کې ترسره شوه. هغه پرتمینه غونډه چې د دغو سياليو د پيل په مناسبت جوړه شوې وه، د کابل ښار آتمې ناحيې آمر مولوي برهان الله فضلي مېلمنو او ګډون والو ته د ښه راغلاست ترڅنګ، د یادو سياليو د څرنګوالي او اهمیت په تړاو هر اړخيز معلومات وړاندې کړل. له بلې خوا د کابل ښار پوهنې رئيس هم د زده کوونکو او ځوانانو د علمي معلوماتو غني کولو په برخه کې د يادو سياليو د ګټو په باب خبرې وکړې او ويې ويل: لله الحمد چې د پوهنې وزارت د رهبرۍ په هڅو د ښوونې او روزنې په برخه کې د درسونو کیفیت لوړ شوی او له شک پرته د دا ډول پروګرامونو په لاره اچول کولای شي، د ځوانانو ترمنځ علمي لېوالتیا لوړه او د مطالعې فرهنګ ته وده ورکړي. په پام کې ده، هغه زده کوونکي چې په دغو سیالیو کې معیاري نمرې تر لاسه کړي، د پوهنې مسئولینو له خوا په ستاینلیکونو او جایزو وویاړل شي.
