د سویل ختیز زون ولایتونو د ښوونکو د مسلکي پراختیا علمي غړو لپاره مسلکي سیمینار پرانیستل شو
د غزني ولایت په پوهنې ریاست کې د هېواد د سویل ختیز زون اړوندو ولایتونو (پکتیکا، پکتیا، خوست او غزني) د ښوونکو د مسلکي پراختیا علمي غړو لپاره میتودیکي سیمینار پرانیستل شو.
په یادو مراسمو کې د پوهنې وزارت د ښوونې او روزنې معین الحاج مولوي سخاءالله سعيد، د دغه وزارت د مسلکي پراختيا رئیس او د يادو ولايتونو پوهنې رئيسانو هم حضور درلود.
په ورته مهال د غزني ولایت د پوهنې رئیس الحاج مولوي میرنصیر احمد حسیني ورغلو مېلمنو ته ښه راغلاست ووایه، د کارکوونکو او د ښوونکو د مسلکي غړو وړتیا لوړولو په اهمیت او رول یې خبرې وکړې او د ورته پروګرامونو جوړول یې خورا اړین وبلل.
په پاى کې نورو ويناوالو هم د موضوع په اړوند خبرې وکړې او له ګډون والو يې وغوښتل تر څو د ياد سيمينار له علمي محتوا څخه اعظمي ګټه پورته کړي.
د یادولو ده، په همدغه سیمینار کې ټولتال ۴۵۰ تنو ګډون کړی وو، چې له دې ډلې یې ۱۱۰ تنه د غزني ولایت مسلکي پراختیا غړي دي.
