په بلخ ولایت کې د ښوونځي لپاره د یو محراب جومات د ودانۍ بنسټ ډبره کېښودل شوه
د بلخ ولايت پوهنې مسئولينو له خوا د یاد ولايت بلخ ولسوالۍ اړوند د رحمان بابا منځني ښوونځي په انګړ کې د یو جومات بنسټ ډبره کېښودل شوه.
په یادو مراسمو کې د پوهنې پر مسئولینو سربېره د سیمه ییزو ادارو چارواکو، د یادې ولسوالۍ قومي مخورو او علماءکرامو هم حضور درلود.
ويناوالو د جوماتونو او د پوهنیزو بنسټونو جوړول د ټولنې په اصلاح او پرمختګ کې خورا مهم او ارزښتناک وبلل او زیاته یې کړه، چې له دغو مرکزونو سره مرسته د صدقه جاریه نېکو اعمالو څخه ګڼل کېږي.
د مسئولینو په خبره، د دغه جومات د جوړېدو لپاره د سیمې خلکو یو مېلیون افغانۍ مرسته کړې ده.
د ياد جومات لپاره د اوداسه خونه، تشنابونه او نورې اړتياوې هم په پام کې نيول شوې دي، چې په يو وخت کې به د ٢٠٠ تنو لمونځ کوونکو ظرفيت ولري.
