په بامیان ولایت کې د کانکور آزمویښتي آزموینه واخیستل شوه
د بامیان ولایت پوهنې ریاست له خوا د یاد ولایت په مرکز او ولسوالیو کې د دولسمو ټولګيو له ۲۶۱۱ تنو زده کوونکو څخه د کانکور آزمویښتي آزموینه واخیستل شوه.
د باميان پوهنې رئيس قاري عنايت الله سهار چې د يادې آزموينې په پرانيستونکي پروګرام کې يې ګډون کړی و؛ د زده کوونکو د تحصيلي کچې د لوړولو او د آزموينې له مېتودونو سره د هغوى د آشناکولو په موخه د دا ډول پروګرامونو ترسره کول خورا ګټور او اړين وبلل.
نوموړي له زده کوونکو وغوښتل، چې د علم او پوهې په ترلاسه کولو او د خپلې ښوونیزې کچې لوړولو په برخه کې د هېواد د پرمختګ لپاره هلې ځلې وکړي.
د یادولو وړ ده چې د کانکور دغه آزمویښتي آزموینه، د بامیان ولایت پوهنې ریاست د ساینس مرکز علمي غړو له خوا د همدغه ولایت د ۱۱۳ بابه لېسو د دولسمو ټولګيو د ۲۶۱۱ تنو زده کوونکو لپاره په ټولو ولسوالیو کې په لاره واچول شوه.
