د پوهنې وزارت د استخدام رئیس د بغلان ولایت له یو شمېر ښوونیزو بنسټونو لیدنه وکړه
د پوهنې وزارت د استخدام رئیس مولوي محمد صادق «صدیقي» چې د مختلطو ښوونځیو د ښوونیز وضعیت د تحلیل په موخه بغلان ولایت ته تللی، نن د مرکزي بغلان ولسوالۍ د پوهنې آمر او کارکوونکو سره غونډه وکړه.
نوموړي په دې کتنه کې سیمه ییزه مسئولینو ته د پوهنې وزارت د پراختیایي پلانونو د تشرېح په ترڅ کې، د وزارت د رهبرۍ له لوري د ښوونیزو پلانونو د تطبیق په برخه کې د همکارۍ ډاډ ورکړ.
ورپسې ورغلي پلاوي د مرکزي بغلان د دلقیان، دولت زي، شهید ناز کمیر او سر اراضي عالي لېسو له تدریسي او اداري چارو څخه لیدنه وکړه او د یادو ادارو د ښوونیز وضعیت د ارزونې په ترڅ کې یې په خپلو خبرو کې د همدغو تعلیمي مرکزونو چارواکي خپلو اساسي مسئولیتونو ته متوجې کړل.
همدارنګه نوموړي د سیمه ییزو مسئولینو ستونزې او وړاندیزونه واورېدل او د حل په برخه کې یې د همکارۍ ژمنه وکړه.
له بلې خوا د يادو ښوونځيو مسئولينو د پوهنې وزارت پلاوي ته د هرکلي ترڅنګ، ډاډ څرګند کړ چې د یاد وزارت د رهبرۍ په رڼا کې به خپلې دندې ترسره کړي.
