د پوهنې وزارت د استخدام رئیس له بغلان څخه لیدنه وکړه
د پوهنې وزارت د استخدام رئیس مولوي محمد صادق صدیقي بغلان ولایت ته د خپل کاري سفر په ترڅ کې، د دغه ولایت د مختلطو ښوونځيو وضعیت وارزاوه. په پیل کې نوموړي په هغه غونډه کې ګډون وکړ چې پکې د بغلان پوهنې رئیس او مسئولینو حضور درلود. همدارنګه د پوهنې وزارت د استخدام رئیس د یاد ولایت د پوهنې رئیس او یو شمېر نورو مسئولینو په ملتیا، د پلخمري ښار له حضرت عمر فاروق( رضی الله عنه)، نمبر ۲، خاتم الانبیاء او میهن ښوونځيو څخه لیدنه وکړه او د ښوونیز وضعیت ارزونې ترڅنګ یې مسئولین خپلو بنسټیزو موخو ته متوجې کړل. دغه راز نوموړي د سیمه ییزو چارواکو ستونزې او وړاندیزونه هم واورېدل او په حل کې یې د همکارۍ ژمنه وکړه. له بلې خوا مسئولينو خپلو ښوونځيو ته د ورغلي پلاوي له ورتګ څخه د هرکلى ترڅنګ ډاډ ورکړ، چې د پوهنې وزارت د مشرتابه د لارښوونو په رڼا کې به خپلې دندې ترسره کړي.
