د خوست ولایت د ښوونیزو بنسټونو د مسئولینو لپاره احصائیوي سیمینار پرانیستل شو
د خوست ولایت په مرکز او ولسوالیو کې د پوهنې ریاست د ۱۵۲ تنو مسئولینو، د کیفیت د تضمین آمریت کارکوونکو او د پوهنې آمریتونو د غړو لپاره، د ارقامو او احصائیوي معلوماتو د راټولولو په موخه د وړتیا لوړونې روزنیز سیمینار پیل شو.
ياد پروګرام د پوهنې وزارت د احصائیې او معلوماتو د رئيس مولوي بسم الله نعماني له خوا په داسې حال کې پرانیستل شو، چې پکې د ياد ولايت د پوهنې رئيس مولوي فیض الله جمال حقاني هم حضور درلود.
په پیل کې د خوست ولایت پوهنې رئیس د پوهنې وزارت د احصائیې او معلوماتو رئیس ته د ښه راغلاست په ترڅ کې، د کارکوونکو د مسلکي کولو او د هغوی د وړتیاوو لوړولو په برخه کې د سیمینارونو پر اهمیت خبرې وکړې او له ګډون والو یې وغوښتل چې د یاد سیمینار له منځپانګې اعظمي ګټه واخلي.
د دغه پروګرام په دوام، د پوهنې وزارت د احصائیې رئیس هم خوست ولایت ته د خپل پلاوي د سفر په اړه خبرې وکړې او ویې ویل: د دغه پروګرام اساسي موخه د پوهنې وزارت د کارکوونکو د وړتیاوو لوړول او په ادارو کې د شفاف او ځواب ویونکي سیسټم جوړول دي.
نوموړي زیاته کړه: همدغه سیمینار به د یاد ولایت په مرکز کې د ۳ ورځو لپاره او په څلورو ولسوالیو کې د ۶ ورځو لپاره دوام ولري.
