د پوهنې وزارت سرپرست په یو رسمي سفر بامیان ولایت ته ورسېد
د پوهنې وزارت د سرپرست الحاج مولوي حبیب الله آغا په مشرۍ د یاد وزارت یو لوړ پوړی پلاوی، د بامیان ولایت له یو شمېر مدارسو او ښوونځیو څخه د لیدنې او د پوهنیز وضعیت د ارزونې په موخه، دغه ولایت ته ولاړ.
په پیل کې د پوهنې وزارت سرپرست د یاد ولایت د پوهنې ریاست له مسئولینو سره د لیدنې پر مهال، د یو شمېر رسمي ادارو له استازو او سیمه ییزو چارواکو سره وکتل او د پوهنې پر اړوندو مسایلو یې نظرونه تبادله کړل.
همدارنګه نوموړی د یاد ولایت د پوهنې ریاست مسئولینو او یو شمېر علماوو په ملتیا، د بامیان ولایت د ښوونکو د مسلکي پراختیا زون له آمریت، جهادي مدرسې او بېلابېلو څانګو څخه لیدنه وکړه او د یادو بنسټونو له مسئولینو او کارکوونکو سره یې وکتل.
د پوهنې وزارت سرپرست د بامیان ولایت د پوهنې ریاست له مسئولینو او کارکوونکو سره د لیدنې په ترڅ کې، د ښوونیز وضعیت لاښه والي په موخه د هغوی ستونزې او وړاندیزونه واورېدل شول او د ستونزو په حل کې یې د همکارۍ ژمنه وکړه.
