په غزني ولایت کې د یو باب عالي لېسې لپاره د بنسټ ډبره کېښودل شوه
د غزني ولايت جاغوري ولسوالۍ اړوند په علیات او شغله کليو کې د يوې لېسې د ودانۍ د بنسټ ډبره، د يو لړ مراسمو په ترڅ کې چې پکې د یاد ولایت پوهنې رياست مشرتابه پلاوي، علماوو او قومي مخورو ګډون درلود، کېښودل شوه.
د جاغوري ولسوالۍ د پوهنې آمر مولوي بسم الله حميد وويل، د یادې لېسې ودانۍ په پینځه جرېبه ځمکه کې چې ۱۶ درسي ټولګي، دوه اداري څانګې، يوه کمپيوټر خونه، یو کتابتون، د کنفرانسونو تالار، لوبغالی او نور اړین ملحقات لري جوړېږي او په جوړیدو سره به یې د دغې ولسوالۍ ۵۰۰ تنو ماشومانو ته د زده کړو مناسب چاپېریال برابر شي.
د نوموړي په وينا، د دغه ودانۍ ټول لګښت ٨،٥ ميليونه افغانۍ اټکل شوى، چې د جاغوري ولسوالۍ د پوهنې دوستو خلکو او سوداګرو له خوا تمويلېږي.
د پوهنې وزارت مشرتابه په داسې حال کې چې د پوهنې د بډاینې لپاره د خلکو مرستې مهمې ګڼي، د غزني ولایت د جاغوري ولسوالۍ د علم پروره خلکو له مرستو مننه کوي.
