په کاپیسا ولایت کې د درسي کتابونو د وېش بهیر پیل شو
د پوهنې وزارت مشرتابه له لارښوونې سره سم د کاپیسا ولایت ښوونځیو ته د ښوونیز نصاب د نویو چاپ شویو درسي کتابونو د وېش بهیر پیل شو.
د درسي کتابونو د وېش د پيل په مراسمو کې د پوهنې پر رئيس مولوي محمد فريد حقاني سربېره، د ياد ولايت د مرکزي ادارو او ولسواليو پوهنې آمرينو او د پوهنې وزارت د نشراتو او عامه اړيكو رياست استازي هم حضور درلود.
د کاپيسا ولايت پوهنې رئيس د ياد ولايت ښوونځيو ته د درسي کتابونو د وېش له بهير څخه خوښي څرګنده او زياته يې کړه، زده کوونکي درسي کتابونه په مناسب وخت ترلاسه کوي، ځکه په دې سره دوی کولای شي د ژمي په رخصتۍ کې له هغو استفاده وکړي او د راتلونکي ښوونیز کال لپاره بشپړ چمتووالی ولري.
په دې پړاو کې به ټولټال ۳۹۳زره۹۰۸ ټوکه کتابونه چې د یومرستندویه بنسټ له لوري چاپ شوي د هغه ولایت پر زده کوونکو ووېشل شي.
د يادونې وړ ده، د کاپيسا ولايت ښوونځيو لپاره ټولټال۶۱۶ زره۷۶ ټوکه کتابونه پلان شوي وو، چې د تېر کال په لومړي پړاو کې ۲۰۶زره۹۴۱ ټوکه کتابونه وېشل شوي وو.
د يادو کتابونو په کڅوړو کې له لومړي څخه تر دولسم ټولګي پورې په دري او پښتو ژبو د بېلابېلو مضمونونو ۱۳۳ عنوانه درسي کتابونه شامل دي چې په وېشلو سره به يې د کاپيسا ولايت په ښوونځيو کې د کتابونو د کمښت ستونزه تر يوه بريده هواره شي.
