د اروپايي ټولنې سفیرې د پوهنې وزارت له سرپرست سره وکتل
د اروپايي ټولنې سفیرې Raffaela Iodice او ورسره مل پلاوي، د افغانستان د پوهنې وزارت له سرپرست الحاج مولوي حبیب الله آغا سره د هغه په دفتر کې وکتل او د پوهنې وزارت اړوند موضوعاتو په اړه یې ورسره تفصیلي خبرې وکړې.
په پیل کې د پوهنې وزارت سرپرست د اروپایي ټولنې اړوند راغلو مېلمنو ته ښه راغلاست ووایه او څرګنده یې کړه، چې د افغانستان.ا.ا. له نړیوالې ټولنې سره د دوه اړخیزو ښو اړیکو غوښتونکی دی.
نوموړي وویل: له بده مرغه د تېرو څلوېښتو کلونو جګړو افغانستان د پرمختګ په لاره کې شاته وغورځاوه، ځکه چې د هېواد پرمختګ قوي ښوونیز نظام ته اړتیا لري، نو موږ غواړو چې د هېواد پرمختګ او پر ځان بسیاینې په موخه، پوهنیز نظام ته وده او پراختیا ورکړو، هر ماشوم ته قلم او کتاب ورکړو، ترڅو د زده کړې او تخصص په ترلاسه کولو سره خپل هېواد له دې شاتګ او شته ستونزو څخه وژغورو.
د پوهنې سرپرست وزیر زیاته کړه: موږ نړۍ ته په منفي ډول پیژندل شوي یو، موږ غواړو چې دوی افغانستان ته راشي او هرڅه له نږدې وګوري.
د نوموړي په خبره، د ا.ا.ا. هڅه کوي، په هېواد کې له ټولو آسانتیاوو سره سم یو معیاري او مجهز روغتون جوړ کړي، ترڅو هېوادوالو ته د آسانتیاو برابرولو او د ناروغانو د درملنې په موخه بهر ته د تګ مخه ونیول شي.
ورپسې د اروپا یي ټولنې سفیرې د پوهنې وزارت سرپرست سره د لیدنې له امله خوښي څرګنده کړه او ویې ویل : د یاد وزارت مشرتابه له خپل ټول مصروفیت سره سره د هغوی سره د دوه اړخیزه لیدنې وخت ورکړ.
هغې د خپلو خبرو په دوام د پوهنې وزارت مثبتو کړنو ته په اشارې سره د دې وزارت د کړنو ستاینه وکړه او د یاد وزارت کړنې یې مثبتې وارزولې.
یاد پلاوي د بامیان او کندهار ولایتونه د بېلګې په توګه یاد کړل، ويې ويل: په افغانستان کې ښه پرمختګونه روان دي او موږ ورته خوشبين يو، په افغانستان کې امنيت تامين شوى، د نشه يي توکو کښت، توليد او قاچاق صفر ته رسېدلى او دا يوه ستره بريا ده.
د اروپایي ټولنې سفیرې څرګنده کړه: له افغانستان سره بشردوستانه مرستې مشروطې نه دي، اوسمهال له افغانستان سره ۱۴۳ میلیونه یورو مرسته کېږي، چې په دې کې د افغانستان د پوهنې برخه هم شامله ده.
ياد پلاوي د پوهنې وزارت مشرتابه ته ډاډ ورکړ، چې په نیږدې راتلونکي کې به په مرکز او ولايتونو کې د ٤٠٠ ښوونځيو د ترميم او بيارغونې لپاره د اړتيا وړ مالي بوديجه له يوې همکارې مؤسسې سره برابره کړي.
نوموړې همدا راز زیاته کړه، چې د پوهنې بهیر څخه د پاتې ماشومانو د جلبولو په موخه به د سیمه ییزو زده کړو ټولګي (CBS) پراخ او په ټول هېواد کې به یې شمېر زیات کړي.
د یادې ناستې په پای کې دواړو لوریو د ستونزو د هواري لپاره خبرې اترې اړینه اومهمه پروسه وبلله.
