له ولایتونو څخه د پوهنې خبرونو ته کتنه
بلخ
د پوهنې وزارت د ښوونې او روزنې معینیت اړوند پلاوی، د ښوونکو او د ښوونځیو د شوراګانو غړو ته د ظرفیت لوړونې د پروګرامونو د وړاندې کولو په موخه، بلخ ولایت ته تللی او د یاد ولایت له پوهنې مشرتابه سره یې د لیدنې پر مهال، د خپلو موخو په تړاو تفصیلي خبرې وکړې.
بل خوا د بلخ پوهنې رئیس الحاج مولوي عبدالجلیل شهید خېل د پوهنې د ودې په برخه کې د دوی کارونه اغېزمن وبلل او له ورغلي پلاوي سره یې د هراړخیزو همکاریو ژمنه وکړه.
پکتیا
د ښې حکومتوالۍ په موخه د ملکي او نظامي ادارو د دندو او کړنو د بیا کتنې کمېټې، د پکتیا ولایت له پوهنې رئیس سره وکتل او د یاد ریاست کړنې او راتلونکي پلانونه یې وڅېړل.
د پکتيا پوهنې رئيس مولوي عبدالوکيل خالد، له ورغلي پلاوي سره د پوهنې رياست لاسته راوړنې او ستونزې شريکې کړې او دواړو لورو د راتلونکو همکاريو په اړه هر اړخیزې خبرې وکړې.
سمنګان
د سمنګان ولایت پوهنې رئیس الحاج مولوي نصرت الله فیضاني او ورسره مل پلاوي، د یاد ولایت له والي الحاج مولوي عبدالاحد فضلي سره وکتل.
دواړو لورو د ماشومانو د چاپېریال او د هغوی د ښوونې او روزنې لپاره د آسانتیاوو په برابرلو کې خبرې او نظرونه تبادله کړل.
د سمنګان ولایت پوهنې رئیس د یاد ولایت د والي له پاملرنې مننه وکړه او له هغوی یې د همکاریو د دوام غوښتنه وکړه.
د سمنګان والي یو ځل بیا له پوهنې رئیس سره له خپل لوري د همکاریو پر ژمنتیا ټینګار وکړ.
ننګرهار
د ننګرهار ولایت پوهنې ریاست له ۷۰ تنو نوماندانو څخه رقابتي آزموینه واخیسته، تر څو د یاد ولایت د لعلپورې ولسوالۍ په ښوونځیو کې د ښوونکو په توګه په دندو وګمارل شي.
کندوز
د پوهنې په برخه کې یوه همکار بنسټ، په کندوز ولایت کې د سیمه ییزو او چټکو ټولګیو ۱۱۰ تنو ښوونکو ته چې ۵۳ یې ښځې وې، د ظرفیت لوړونې یو سیمینار جوړ او هغوی ته یې د تدریس مېتودونه ور وښودل.
